ജിമ്മി ജോർജ്ജ് ഫൗണ്ടേഷൻ അവാർഡ് അന്താരാഷ്ട്ര ബാഡ്മിന്റൺ താരം എച്ച് എസ് . പ്രണോയ്ക്ക്

                                                                 

കേരളത്തിലെ മികച്ച കായിക താരത്തിനുള്ള മുപ്പത്തി നാലാമത്   ജിമ്മി ജോർജ്ജ് ഫൗണ്ടേഷൻ അവാർഡിന്  അർജുന അവാർഡ് ജേതാവ് കൂടിയായ  അന്താരാഷ്ട്ര ബാഡ്മിന്റൺ താരം എച് . .എസ് . പ്രണോയ്   അർഹനായി .  ഒരു ലക്ഷം   രൂപയും ഫലകവും അടങ്ങുന്നതാണ് പുരസ്‌കാരം. ജോസ് ജോർജ് ഐ.പി.എസ് . ചെയർമാനും , അഞ്ജു ബോബി ജോർജ്, റോബർട്ട് ബോബി ജോർജ്, സെബാസ്റ്റ്യൻ ജോർജ്, ടി.ദേവപ്രസാദ് എന്നിവർ അംഗങ്ങളുമായുള്ള കമ്മിറ്റി ആണ് ജേതാവിനെ തെരഞ്ഞെടുത്തത് .

ഇന്ത്യയുടെ വോളിബോൾ ഇതിഹാസം  ജിമ്മി ജോർജിന്റെ സ്മരണയ്ക്കായി 1989-ൽ   ആണ് ഫൗണ്ടേഷൻ അവാർഡ് ഏർപ്പെടുത്തിയത് .  2022 ൽ  ഇന്ത്യയെ ചരിത്രത്തിൽ  ആദ്യമായി തോമസ് കപ്പ് ജേതാക്കൾ ആക്കുന്നതിൽ നിർണായക പങ്കു വഹിച്ച പ്രണോയ്  ലോക  ടൂർസ് ഫൈനൽ റാങ്കിങ്ങിൽ ഈ വർഷം  ഒന്നാം സ്ഥാനത്ത്  എത്തുകയുണ്ടായി  . 2016 ൽ  സ്വിസ് ഓപ്പണും , 2017  ൽ  യു  .എസ്  ഓപ്പണും കരസ്ഥമാക്കിയ പ്രണോയ്  2018  ലെ  കോമൺവെൽത്ത്  ഗെയിമ്സിൽ  ടീം  ഇനത്തിൽ  സ്വർണ്ണ  മെഡലും , ഏഷ്യൻ ചാമ്പ്യൻഷിപ്പിൽ   സിംഗിൾസിൽ  വെങ്കല മെഡലും  കരസ്ഥമാക്കി. 2018  ലെ ജക്കാർത്ത ഏഷ്യൻ ഗെയിമ്സിൽ പങ്കെടുത്തു   ബാഡ്മിന്റൺ ലോക റാങ്കിങ്ങിൽ ആദ്യത്തെ പത്തിൽ സ്ഥാനം നേടിയത് പ്രണോയിയുടെ  ശ്രദ്ധേയമായ നേട്ടം ആയിരുന്നു . ഈ വർഷം  രാജ്യം അർജുന അവാർഡ് നൽകി ആദരിച്ചു  . 

പി. സുനിൽ കുമാറിന്റെയും ,  ഹസീനയുടെയും മകനായ  പ്രണോയ്  തിരുവനന്തപുരം സ്വദേശിയാണ് .                 ഓ എൻ .ജി. സി യിൽ ഉദ്യോഗസ്ഥൻ . ബാഡ്മിന്റൺ കോർട്ടിൽ തന്റെ പങ്കാളി ആയിരുന്ന ശ്വേതയാണ് ഭാര്യ .

നവംബർ 30 ന്  ജിമ്മി ജോർജ് വിടവാങ്ങിയിട്ടു   35  വർഷം.  ഡിസംബർ  24  നു പേരാവൂർ മാരത്തോണിന്റെ  ഭാഗം ആയി ജിമ്മി ജോർജ് സ്റ്റേഡിയത്തിൽ നടക്കുന്ന ചടങ്ങിൽ അവാർഡ് സമ്മാനിക്കും